BARUNDI,

BARUNDIKAZI,

BADASIGANA,

RWARUKA,  

Igenekerezo rya 13 Gitugutu, kuva 1961, uri mu minsi y’intibagirwa mu Burundi, haba ku Badasigana canke ku bandi Barundi badahurikiye mu mugambwe UPRONA, eka no kuri uwo wese yitaho kahise canke kazoza k’Uburundi.  

Kukaba nkako, kuri iryo genekerezo rya 13 Gitugutu, ata n’amezi abiri ararangira Abarundi bahejeje kwereka amakungu ko bahagaze inyuma y’ishaka ry’umugambwe UPRONA ryo guhabuza  ata kudidinganya intahe y’Uburundi, inyankaburundi zaciye zikora ibara zirahekura Uburundi, ziragandagura umuganwa LUDOVIKO RWAGASORE.  

Ariko nk’uko babivuga mu Kirundi “uta inkoko ntuta ico ibitse“. Iryavuzwe ryaratashe, naho twari mu maganya no mu marira, twarikukiye. 

Uyu munsi rero twibuka imyaka 40 irangiye bagandaguye incungu y’Uburundi, ni umunsi w’umubabaro ku barundi bose, baba abashigikiye ivyiyumviro vya RWAGASORE canke abo bahiganywe; intahe yaziye bose. Akaba ari naco gituma, naho ari umunsi w’umubabaro, ni n’umunsi w’ukuzirikana, wo gukubita agatima mpembero, tukagereranya, tukaraba ico RWAGASORE yapfuye azira, iragi yadusigiye ko tukibigendera.  

Ni twaba tukibigendera, tuvyumeko, tubikomeze. Tukaba twarabidohotseko, niwo mwanya wo kwikebuka, tukisubiza umutamana yasize atwambitse. 

Turavye rero ibihe Uburundi bugezemwo, si agaseseshwarumuri ko intahe RWAGASORE yaharaniye isigaye imeze nk’agati kasigaye mu muyonga. Kukaba nkako, haba ngaha iwacu canke mu bindi bihugu, igihugu cikukiye kigira imbibe kikazicungera, gitewe kikivuna, kigatunganya intwaro, kigaharanira ubumwe n’amahoro vyo nkingi y’iterambere. Ivyo ni vyo RWAGASORE n’abarundi bamwitavye baharanira. 

Ikibazo twokwibaza rero uyu munsi ni iki :  muri iyo migambi RWAGASORE yaharaniye, akanayipfira, Uburundi bugeze he mu kuyishira mu ngiro muri iyi myaka 40 tugira turumye turonse intahe yo kwikukira? 

Kuva RWAGASORE adupfiriye, intwaro zitari nke zaragiye zirabisikanya; mu gihe kimwe tukagira amahirwe, mu kindi gihe ubumwe bugahungabana, igihugu kikagwa mu kaga, ikiza n’isibe bigasinzikaza Uburundi n’Abarundi.  

         Turavye rero ibiriko biraba mu Burundi, kuva mu 1993 umugambwe FRODEBU wiziziye intwaro, ni agahomerabunwa. Uburundi bwarinjiranywe n’ubutindi n’akaranda, igihugu cizizirwa n’umugera w’amacakubiri n’ihonyabwoko . Nta n’umwe atavyibuka, kandi umugambwe w’abadasigana wari wasemereye, uraburira abarundi, uratabaza n’amakungu, kugirango Abarundi babe maso ibara ntirigwe. Ivyo vyose vyabaye impfagusa, Abarundi tuba nka ya mpongo yapfa yaburiwe.  

        Umugambwe FRODEBU warashize mu ngiro imigambi yawo yo guturira Uburundi mu kwica Abatutsi n’Abahutu bayihakaniye gukurikira uwo mugambi wo gusesa amaraso y’abonse rimwe, basangiye ugupfa n’ugukira kuva isi ikiremwa n’Uburundi bukironka iryo zina. 

        Ivyo rero vyatanguye umugambwe Frodebu ugikorera mu kinyegero, birabandanya aho wemerewe gukorera ahabona n’amategeko dusemerera. 

        Akamaramaza n’ibara vyadutse muri gitugutu mu 1993, aho aba Frodebu na ba somambike babo, bitwaje ngo umukuru wabo yapfuye, nkuko wamengo ntiyari uw’Abarundi bose, birara mu Badasigana cane cane, bahitana abato n’abakuze, abatama n’abatamakazi, inzoya n’inda ziri mu nda, baraca imitwe, inzoya barasekura, bakabata mu tuzu twa surwumwe, baraturira amazu, imirima n’ibitungwa, baratema, baratongora... 

        Abacitse kw’icumu bomorerwa mu buhungiro aho inzara n’inyota, imbeho n’igikonyozi bibatundira ijoro n’umurango, bapfuye basegerereza kandi bavuye mu zuzuye. 

        Ivyo rero vyabaye mu ntara zose. Ntaworinda kuvuga ivyabereye mu nderabigisha yo mu Kibimba, aho abitwa ngo ni abarezi bo muri Frodebu, barongowe n’umuyobozi w’iryo shule, baturira ibibondo igihugu cari cabashinze kurera. Ntawosubira kurinda kudondagura za Butezi, Bugendana, Teza, Ryansoro, Rukina, Rutegama, Rango, Buta, n’ahandi tutarinze kuvuga... Abahitanywe n’iryo honyabwoko, hamwe n’abagorewe mu buhungiro batagira Shinge na Rugero, bashika hafi umuliyoni.

        Kuva muri ico gihe, Abadasigana n’Abarundi batari bake barakomye induru, barasemerera, ariko barabura uwo batura amarira. N’aho umurwi urungitswe n’ishirahamwe mpuzamakungu ONU gutohoza iryo shano werekanye neza ko iryo shano ryagira umugambwe Sahwanya, abategetsi b’Uburundi baranse kuwushengeza ngo uje imbere y’intahe, ucibwe urubanza, ufutwe nk’uko vyashikiye iyindi migambwe yo mu bindi bihugu yakoze ihonyabwoko nk’iryo. 

        Mu 1996, aho Petero Buyoya agarukiye ku butegetsi, abwira Abarundi ngo aje gukura Uburundi ku manga bene FRODEBU babushizemwo, agahenda Abarundi ngo agarukanywe n’ukubaronderera vy’ukuri amahoro, ngo nta nteko zizigera zihonyora mu Burundi kuko bufise abarundi b’umutima n’abasirikare bakwiye bo kubukingira, akirukana Ntibantunganya na Nduwayo abagiriza ko vyabananiye kugarukana amahoro n’umutekano, kandi bagiye i Arusha gutaka inteko z’abanyamahanga, Abarundi batari bake, na cane cane Abadasigana bariruhukije, bati ashii! Bati Uburundi bwoba bugira busubire kuba Uburundi nyakuri, bwogorore. 

Ihibambewe­!!! N’ubu amaso aracaheze mu nzira . Aho gushengeza FRODEBU yagirijwe icese ko ariyo yateguye kandi ikagira ihonyabwoko, Buyoya yayigize inkingi y’inzego nshingwantwaro mu vyo yise umugambi w’amahoro yagiye kuronderera ARUSHA muri Tanzaniya. Ibi ntawobirandirako, twaragiye turashikiriza amatangazo yo kuvyiyamiriza; Abarundi benshi baradushigikiye naho Leta iguma ibazigitira muri iyo nzira y’urupfu. 

Si ivy’imbeshere rero , mwese murabona ko ico ciswe umugambi w’amahoro cahavuye gihinduka indava isasirwa abagize ihonyabwoko. Mu gihugu cose Umurundi asigaye ari sindamuka, sinirirwa. Nta joro, nta mutaga bicijana ya migwi Frodebu, F.N.L., Palipehutu, CNDD/FDD itisasiye inganda. Leta nayo ngo nyabuna abo ntimukoreko nibo ncuti mfise, ngo ni nabo bazokingira abategetsi n’inzego zirongoye igihugu. 

Ubu noneho, ico Abarundi bari bamiriye kure, ni co casubiye kwaduka. Buyoya n’abo bacuditse birigwa kurarika inteko z’abayamahanga kumwe kwa Ntibantunganya mu 1996. Ico Abarundi batohendwa ko ni uko uko gusaba inteko atari ugushaka gukiza igihugu n’intete. Ni ingingo ijanye na wa mugambi wa FRODEBU n’abafasha bayo wo kubandanya ihonyabwoko, cane cane babanje gusambura urwego rw’intwaramiheto z’Uburundi, ejo ntihazogire igitabara.  

Ku vyerekeye ivy’ubutunzi, igihugu kigeze aho umwansi ashaka; kiri mu nyenga. Yaba umurimyi, umukozi wa Leta, canke w’amashirahamwe n’amahinguriro yegamiye Leta, eka mbere n’abikorera utwabo batari bake abayeho uno munsi ntamenya ingene azobaho ejo.

Ivyo vyose bikava ingene igihugu gitwawe nabi, Leta itanezwe namba kurazwa ishinga n’ineza n’ubuzima bw’abanyagihugu. Ibiciro ku masoko biduga ku munsi, biba ibinyobwa, biba ibiribwa twihingurira iwacu.  

Ikitavuzwe co ni ibiciro vy’imiti bituma ingwara z’ubwoko bwose zisasika inganda. Amahera n’ibiciro vy’ibikoresho vy’ishule bituma ishule yabaye iy’abakire, nciyaho nawe akazokwama mu muzimiza w’ubujuju. Amakori n’amataxe ni ko kw’uko, asigaye ari umurengera, kandi utabona namba ico afasha abayatanga. Ahanini aguma mu mipfuko y’bayatoza, kuva ku mukuru gushika ku muto. Ugusesagura n’ukwiba ikigega canke ayandi matungo y’igihugu vyahindutse ihiganwa n’ubuhizi.  

Mu ncamake, bamwe Rwagasore yararikira Abadasigana ngo biyamirize, aribo imihimbiri, ibisuma n’abambuzi, ni bo bagariye mu nzego z’igihugu.  

Ivyo ni vyo Abarundi, na cane cane abadasigana, bategerezwa kwumva, bakavyamirira kure, bagatera ivyatsi intwaro yavyadukanye n’ababishigikiye; niho bazoba bahagarariye vy’ukuri iragi ry’Umuganwa LUDOVIKO RWAGASORE. 

Barundi, Barundikazi, Badasigana, Rwaruka; 

Dusubire twibukanye ibikuru bikuru Umugambwe w’Abadasigana UPRONA utegerezwa gukora kugira igihugu cacu gisubire kugira iteka. 

I.  ICO UMUNTU WESE ATEGEREJWE KUMENYA : 

1.        Ikibazo nyamukuru casinzikaje Uburundi, ni inyigisho n'ububisha bw'ihonyabwoko. Ako karanda ni ko gategerezwa kwicarirwa imbere ya vyose, kakaranduranwa n'imizi.  

2.        Amacakubiri y'amoko hamwe n'ihonyabwoko si ivyiyumviro vya politike. Ni ivyaha ruhonyanganda bivumwa n'isi yose. Mu Burundi rero si ho  vyorenzwako uruho rw-amazi , gushika n-aho vyiganza.  

3.        Nta gihugu na kimwe gishobora kuramutswa umugambwe wamaze kwagirwa n'icaha c'ihonyabwoko. Abarundi bose baravyiboneye . Ishirahamwe mpuzamakungu ONU riravyemeza muri raporo S/1996/682 yo ku wa 24 Nyakanga 1996, ko umugambwe Frodebu n'abafasha bawo bagiriwe n'icaha c'ihonyabwoko. Kurya umugambwe "MRND" wo mu Rwanda rwa HABYALIMANA n'umugambwe "NAZI" wo mu Budagi bwa HITLER yafuswe, ni ko Frodebu itegerezwa gufutwa , gutuzwa n-ukuranduranwa n-imizi. 

4.        Mu Burundi amahoro yamye ahungabanywa n'imirwi yagize ihonyabwoko ubuhizi hamwe n'intwaro ziri gito ziyishigikira. Inyigisho z'ihonyabwoko hamwe n'imirwi yarikoze bitaranduranywe n'imizi, nta mahoro azoboneka mu Burundi. Igihe ihonyabwoko rizoba ririko rirarwanywa bimwe biboneka, ni ho n'izindi nkozi z'ikibi zizoshobora guhanwa, intahe n'ingingo bigasubira kwubahirizwa mu Burundi. 

5.        Icaha c'ihonyabwoko ntikizimangana kandi ntikigirirwa ikigongwe. Naho intwaro ya Petero BUYOYA yagerageje kwisamaza no gusamaza Abarundi n'amakungu kugira ngo ico caha cibagirwe , nihaboneka Leta ikunda igihugu, Uburundi buzoronka Sentare Mpuzamakungu ihasha ihonyabwoko, nk'uko n'ibindi bihugu vyagowe nk'uku kwacu vyatevye bikayironka.

            II.   IMIGAMBI IZORANGURIRWA MU BURUNDI : 

6.        Gushinga intwaro n'izindi nzego z'igihugu zubahiriza ukwikukira kw'Uburundi,amateka n'amategeko y'Uburundi, amasezerano y'Ubumwe bw'Abarundi, amategeko hamwe n'amabwirizwa mpuzamakungu. 

7.        Guhagarika ubwicanyi bw'ihonyabwoko n'ubundi bwicanyi bwose bwasinzikaje igihugu c'Uburundi n'ibindi bihugu biri muri aka karere. Ubwo bwicanyi buzotuzwa ari uko abakoze ivyo vyaha bamenyekanye kandi bagahanwa hamwe n'ababatumye, yaba imigambwe canke ayandi mashirahamwe; igihugu n'amakungu babiyamirize, kandi bene iyo migambwe n'ayo mashirahamwe asamburwe, amayira yayo azibirwe, kugirango ntibisubire kuvugwa mu Burundi no muri ibi bihugu. 

8.        Gukomeza urunani rw'intamenwa mu kurwanya ihonyabwoko  kuko ata Murundi n'umwe atasinzikajwe n'ako karanda. Urwo rugamba tuzorukomeza dufatanye mu nda. Aho kuryanisha Abarundi, urugamba rwo kurwanya ihonyabwoko rutegerezwa kuba urwo kubavukanisha. 

9.        Kurandurana n'imizi inyigisho z'ihonyabwoko, kugira ngo  politike yose y'igihugu yame yisunga ko ihonyabwoko n'inyigisho bijanye ari ikizira kikaziririzwa mu Burundi. Uko ni ko amategeko n'amabwirizwa mpuzamakungu abitegekanya. 

10.       Gushinga amategeko aringaniza ingene imanza zihasha ihonyabwoko zicibwa mu Burundi. 

11.       Gushinga itegeko rihana abakora mu nkovu beneburundi mu guhakana  ko mu Burundi habaye ihonyabwoko, co kimwe n'abafata minenengwe ayo mahano. 

12.       Gushinga amategeko ashira mu ngiro akongera akubahiriza AMASEZERANO Y'UBUMWE BW'ABARUNDI. 

13.       Gusubiza ijambo Abarundi bose , cane cane abashingantahe bamize akabuye k-abagabo baba mu gihugu canke mu mahanga,  kugira ngo bumvikane ku bibazo nyamukuru bibangamiye Uburundi, bavyumve co kimwe, bongere bumvikane bo nyene ku vyerekeye amabanga y-intwaro mu gihugu bisunze intahe n'ingingo.  

14.       Gushinga ingingo ntabanduka zizokwama zigenga intwaro rusangi nyakuri ibereye Uburundi n'Abarundi , zihereye mu kwamira, mu gutuza inyigisho n'ubwicanyi ubwo ari bwo bwose mu mvugo no mu ngendo y-abaharanira ubutegetsi. Izo ngingo nizo zizoba ishingiro ry'amasezerano ntabanduka kandi ngenderwako atunganya intwaro n'ayandi mabanga yose y'igihugu. 

15.       Gushinga amategeko agenga abaharanira ubutegetsi mu gihugu,  kugira ngo uwo mwuga ntusubire kuba ikuburiro rihuriramwo inkozi z'ikibi, abicanyi, imihimbiri n'abambuzi.

           III.  IMIGAMBI TUZOFASHANYA N'IBIHUGU DUHANA IMBIBE : 

16.    Gushira igikumu ku masezerano y'i LUSAKA atomora neza ingene imirwi ikora icaha c'ihonyabwoko ituzwa mu bihugu vyo muri aka karere.  

17.    Kurarika canke kwitaba inama, gufata canke gukurikiza ingingo zerekeye kwihaniza no kurwanya ihonyabwoko n'ayandi mabi abangamiye ibihugu duhana imbibe. 

IV.       IMIGAMBI TUZOFASHANYA N'AYANDI MAKUNGU : 

18.     Kurarika Abarundi, ibihugu duhana imbibe n'ayandi makungu ngo dufatanye kurwanya ihonyabwoko hamwe n'ibindi vyaha vy'agahomerabunwa. 

19.     Gutera igikumu ku mabwirizwa mpuzamakungu yose arwanya akongera akihaniza ihonyabwoko. Ivyo bijana n'amategeko yunganira ayo mabwirizwa mu gihugu. 

20.     Gushira mu ngiro ingingo zapfunditswe muri raporo S/1996/682 y'umurwi wa ONU waje gutohoza ubwicanyi n'ihonyabwoko vyabaye mu Burundi kuva muri Gitugutu 1993. 

21.     Gusaba dushimitse kandi tutarambirwa Sentare Mpuzamakungu izocira imanza abagize ihonyabwoko mu Burundi. 

22.     Gushinga ibiro bijejwe kurereka no gutuza inyigisho n'imirwi irangwa n'ihonyabwoko. 

23.    Gutohoza ubwicanyi n'ibindi vyaha vyose vyasinzikaje Uburundi , kugira ngo abagirizwa ivyaha bose bace imbere i-intahe. 

Turabipfurije Umunsi mukuru mwiza. 

Ni tugire amahoro n’Umugambwe w’Abadasigana UPRONA. 

                UMUKURU W’UMUGAMBWE W’ABADASIGANA

                        Karoli MUKASI

Retour